Тыва улустуң эрте-бурунгу малчын ажыл-ишчи амыдырал-чуртталгазын уламчылап, чаагай национал ёзу-чаңчылдарын ыдыктыы-биле сагып, мал-маганны хөйү-биле азырап өстүрүп, чонну ак чем, эът, дүк дээш мал продукциязы-биле хандырып чоруур ажыл-ишчилер — бистиң малчыннарывыс.
Тыва Республиканың "Наадым–2025”-тиң хүндүлүг киржикчилери, малчыннарның аразында чылдың-на хөй мал-маганны азырап өстүрүп, ажыл-ишчи ат-алдары бүгү Тывага диңмиреп, чылдың-на Наадымга каш удаа бедик шаңналдарга төлептиг болган кижилер хөй. Оларның аразында Тыва Республиканың алдарлыг малчыны, Наадымнарның каш дапкыр чемпиону, Мөңгүн-Тайга кожууннуң Мөген-Бүренниң малчыны, Тыва Республиканың Ордени хөрээнде чайнаан Эрес-оол Иргит. Ажыл-ишчи малчын “Наадым–2021”-тиң, «Наадым-2023»-түң, «Наадым-2024»-түң чемпиону. «Наадым-2025»-ке база чемпионнаан. Көшкүн малчын чоннуң эрте-бурунгу ыдыктыг оран-савазы өг-бүле 2023 чылдың Наадымынга Эрес-оол Хүлер-ооловичини – малчынның сүлдезиниң бедииниң бадыткалы.
Алдарлыг малчын Эрес-оол Хүлер-ооловичиниң дугайында «Мөген-Бүрен» көдээ ажыл-агый бүдүрүлгезин хөй чылдарда удуртуп келген Тыва Республика орденниң болгаш «Тываның чонунуң чоргааралы» аттың эдилекчизи, Тываның болгаш Россияның көдээ ажыл-агыйының алдарлыг ажылдакчызы Өшкү-Саар Ооржак “Салгал дамчаан малчын” деп материалынга мынча деп бижээн.
“Мөңгүн-Тайга кожууннуң Шегетей деп черде эрес-кежээ сарлык кадарчызы Эрес-оол Иргитти танывас, билбес кижи ховар. Ол салгал дамчаан малчын. Ооң кырган-ачазы Михаил Көже алдарлыг сарлык кадарчызы, “Ленин” ордениниң эдилекчизи, ол ышкаш ада-иези Бора-кыс биле Хүлер-оол Иргиттер ол-ла Шегетейниң алдарлыг малчыннары чораан.
Эрес-оол Иргит 16 харлыындан-на ада-иезинге дузалажып, малчыннап эгелээнден бээр ам дөртен ажыг чыл эрткен. Эртен эрте хойну одарже үндүргеш, орай кежээ киирип келир, чымыштыг мал ажылынга бердинген, ёзулуг эрес-кежээ малчын.
Хой, сарлык малдаарындан аңгыда, Эрес-оол Иргит Кызыл-Хая суму, Мөңгүн-Тайга кожуун болгаш республика чергелиг чадаг чарыштарның доктаамал киржикчизи. Ол Бай-Тайга, Мөңгүн-Тайга кожууннарга болгаш Кызыл — Чедер аразынга чадаг чарыш маргылдааларынга бирги, ийиги, үшкү шаңналдыг черлерни чаалап ап чораан
Бир чамдыкта тергиин малчын Эрес-оол Иргиттиң дугайында бодап олургаш, шупту малчыннар мындыг эрес-кежээ болгаш бедик көргүзүглерлиг турган болза деп бодап келиримге, ала-чайгаар дараазында одуруглар төрүттүнүп келген.
Аалдың адаа аяң черде
Анай, хою, хураганы чапты берген.
Түмен малын хайгаарап каап,
Түрлүг Эрес чоргаар, таваар чортуп чору!”
Эрес-оол Хүлер-оолович Иргит улусчу байырлал Наадымның эң хүндүлүг аалчыларының бирээзи – “Наадым – 25”-тиң чемпиону.
Ш. КҮЖҮГЕТ.
Чурукту интернеттен хоолгалаан.

---

Ссылка на источник:
https://tmgnews.ru/novosti/tulgan-chempion-malchyn-eres-ool-irgit/

---

---