Тывада «Өг-бүлениң үнелиг чүүлдерин кадагалап арттырганы дээш» медальды тургузар дугайында айтырыгны шиитпирлеп турар

Тывада «Өг-бүлениң үнелиг чүүлдерин кадагалап арттырганы дээш» медальды тургузар дугайында айтырыгны шиитпирлеп турар. Тываның Баштыңы
Владислав Ховалыг
Дээди Хуралга чылдың-на бээр Айыткалында чаа күрүне шаңналын киирерин саналдаан. Тываның Чазаа хоойлу төлевилелин май 28-те болган хуралга көрген. Амгы үеде хоойлу төлевилелин парламентиниң депутаттарының сайгарылгазынче чоруткан.
ТР-ниң Күш-ажыл яамызының тускай мергежилдиглериниң белеткээн документизинде бадылажып, өг-бүле туткандан бээр – 50, 55, 60, 65, 70 база 75 чылдаан юбилейин демдеглеп турар өг-бүлелерге медальды тыпсырын айыткан. Ол дээрге өг-бүлениң чаңчылчаан үнелиг чүүлдерин кадагалап, сайзырадырынга, өг-бүле институдун болгаш бадылажылганы быжыглаарынга, ниитилелге өг-бүлениң ролюн бедидеринге оларның ачы-дузазын деткиириниң болгаш хөй-ниитиге үнелээриниң бир хевири-дир.
«Өг-бүлениң үнелиг чүүлдерин кадагалап арттырганы дээш» деп медальга чылдың-на 19 өг-бүлени киирер. Өг-бүлелерни шаңнап тура, 50 муң рубль акша-шаңналын тыпсыр. Республика бюджединде ол сорулгага чылда-ла 950 муң рубльди тускайлаары көрдүнген.
«Өг-бүлениң үнелиг чүүлдерин кадагалап арттырганы дээш» медаль Тываның үлегерлиг өг-бүлелерге тыпсып турары чаңгыс шаңнал эвес-тир. 25 чыл ажыг өг-бүле стажтыг, төлептиг ажы-төлдү кижизидип өстүрген, хөй ажы-төлдүг өг-бүлелерге «Ынакшыл болгаш шынчы чорук дээш» хөй-ниити медалын тыпсып, акша шанналы-биле немей деткиир. Республика «Чылдың өг-бүлези» деп бүгү-российжи мөөрейге тиилээн өг-бүлелерге деткимче кылдыр 100 муң рубльди база Маадыр иелерге 500 муң рубльди төлеп турар.

---

Ссылка на источник:
https://tmgnews.ru/novosti/g-b-leni-nelig-ch-lderin-kadagalap-arttyrgany-deesh-medaldy-turguzar/

---

---