Тыва Республиканың төөгүзүнде шылгараңгай удуртукчуларның бирээзи, бирги болгаш сөөлгү Президентизи деп бедик эрге-дужаалды төлептии-биле бадыткап чораан
онза хүндүткелдиг Шериг-оол Дизижикович!
 Силерниң чырык чер кырынга чаяаттынган авыралдыг, хайыралдыг, ачы-буянныг хүнүңер таварыштыр ак-көк дээрлиг Тывавыстың найысылалы - Кызыл хоорайның удуртулгазының болгаш хөй янзы омак-сөөктүг чурттакчы чонунуң өмүнээзинден изиг байырны чедирерин чөпшээреп көрүңер!
Тыва чуртувусту баштап турган үелериңерден бээр элээн чылдар эртсе-даа Силерни чаңгыс чер чурттугларыңар, кады ажылдап чораан эш-өөрүңер болгаш өске-даа арат - чон бо хүнге чедир чылыг-чымчак сөстер-биле сактып чоруурлар.
Бедик эрге -дужаалга ажылдааш, чуртувустуң сайзыралынга киирген үлүг-хууңар кайы көвей, шупту ону сактыр бис. Ажылыңар кол угланыышкынарыңарның бирээзи - социал политиканың сайзыралы турган.
Бир дугаар үндүрген чарлыыңар "Ие-чаштың камгалалы" болгай. База бир кол шиитпирге улуг идиг бергениңер - Тываны соңгу чүкке деңнешитиргени.
Оон аңгыда силерниң декткимчеңер-биле спорттун аңгы-аңгы хевирлери аажок улуг сайзыралды алган. Бо хүнге чедир чаңчыл болган Президентиниң кубогу дээш волейбол маргылдаазы ам-даа уламчылавышаан, республиканың шыырак дээн мөгелери база бо хүнге чедир аныяк өскенге хүрештиң чараш аргаларын, арга-дуржулгазын дамчыдып, келир үениң шылгараңгай спортчуларын белеткеп чоруурлар.
Хүндүлүг Шериг-оол Дизижикович! Силерниң мерген угааныңарга, байлак арга-дуржулгаңарга, удуртукчу  салым-чолуңарга, чонуңар-биле кезээде чоок чорууруңар дээш чавыс мөгейбишаан, аал-ораныңарга аас-кежикти, хөй санныг өг-бүлеңерге өөрүшкү-маңнайны, кол-ла чүве быжыг кадыкшылды база узун назынны сеткиливис ханызындан күзеп тур бис!
Төрүттүнген хүнүңер-биле!