Тыва Республиканың алдарлыг чылгычызы, Наадымнарның 6 дакпыр аът чарыжының Чемпиону, Өвүр кожууннуң үлегерлиг чурттакчызы Артемий Дагбыш
"Амгы үеде эзиртир суксун аймаан республикавыста 11.00 шактан 15.00 шакка чедир садар деп хоойлу унген-даа болза, бо шакты сагывайн садып турар садыглар бар дээрзи билдингир болгай. Хоорайда-даа, кожуун-суурларда-даа араганы ижип алган кудумчуда элең-тендиң чоруур кижилер көскү. Ол дээш ажыл чоруттунуп турбуже, багай таварылгалар болуп турары хомуданчыг.
Арага деп ажыг сугну ижип алырга бир-ле дугаарында кижиниң бодунуң кадыынга багай, шош-содаа, маргыжыышкыннар болуп, харын-даа амы-тынындан чарлып турар улус бар. Эзирик байдалдыг машина мунуп алган чолаачылар орук озал-ондагында таваржып, бертик-бежил кижилер болуп, улуг-биче кижилерниң амы-тынында чедип турары чажыт эвес.
Арага аймаа болгаш наркотиктер дээрге тыва кижиниң шаандан тура амыдыралынга таарышпас дээрзин билир бис. Оон орнунга мал азырап, аът-хөл тудуп, тараа-быдаа тарып, тыва чаңчылдарывысты сагыылыңар. Спорт, куш-культура, кадык овур-хевир дээш туржуулуңар. Тыва черивисти, чонувусту хүндүлеп чараштыр чурттаалыңар. Ылаңгыя ажыл чок хамаатылар, хөй ажы-төлдүг амыдыралы чегей өг-бүлелелер, сорулга-даа чок чурттап чоруур аныяктар-биле ажылды чорудаалыңар. Хоойлуга удур арага садып турар кижилер база боданыңар.
Кижилерни кончууру, хорууру, кыжырары, аартыктаары эвес, эп-чөп-биле, эш-хуу кылдыр, акы-дуңма кылдыр сеткилинден чугаалажып, сургап, хайгаарары база ажыл-дыр ийн. Багай чүүлдерни болдурбас дээш бот-боттарывысты тыва чон деткижип, карактажып чоруулуңар.
Бис амыр-тайбың черде чурттап, ол хирезинде араганың хайы дээш багай чүүлдерге таваржып, херек чок чүүлдер дээш амы-тынывыска чедип турувуста, бистиң оолдарывыс, акыларывыс, адаларывыс тускайлаттынган шериг операциязында киржип, бажын салып, инвалид бооп-даа кээп турарлар болгай. Бүгү чонумну арага, чашпан, наркотиктерже сундукпазын кыйгырдым!"
"Тыва чонувуста дыка хөй үлегерлиг, чараш, эрес-кежээ, кызымаккай, амыдыралчы, келир үе дээш, ажы-төлү дээш, республикавыстың сайзыралы дээш ажылдап чоруур кижилер дыка хой. Тываны улуг чурттувус Россияда алдаржыдып чоруур спортчуларывыск, артистеривис, эртемдээннеривис, оон-даа ангы адырларда бердинип чоруур мергежилдиг кижилеривист барынга чоргаарланыр мен. Оларга четтирдивис!" - деп база Артемий Калдар-оолович немеп чугаалады.
Чурукта Артемий Дагбыш Республиканың "Наадым-2025" малчыннар байырлалында аът шаңналының соонда Чемпионаан аъдының мунукчузу-биле